चितवन र यस आसपासका दर्शकहरुका लागि प्रविन्द काफ्ले नौलो नाम हैन । चितवनका युवाहरुको कथामा फिचर फिल्म ‘द रियल ग्याङस्टार’ निर्देशन गरेपछि उनी निर्देशकको रुपमा चिनिएका हुन । त्यसताका उनको निर्देशकिय क्षमताको धेरैले तारिफ पनि गरे । उनलाई हौसला दिनेहरु धेरै भेटिए ।
तीनै हौसला र तारिफकै कारण प्रविन्दले निर्देशनलाई निरन्तरता दिइरहेका छन । अहिले उनी मोफसलबाटै विभिन्न म्युजिक भिडियो निर्माण तथा निर्देशनमा सक्रिय छन । मोफसलमा रहेर काम गर्दा तुलनात्मक रुपमा गाह्रो हुने उनको अनुभव छ । काम गर्दै जाँदा आवश्यक पर्ने कतिपय उपकरण मोफसलमै उपलब्ध नहुदा समस्या हुने उनी बताउछन । ‘सानो बस्तु लिनको लागि राजधानी जानुपर्ने हुन्छ’ : उनले सुनाए ।
फिल्म तथा भिडियो छयांकनका लागि आवश्यक अधिकांश समाग्रि उनी आफैसँग भए पनि कहिलेकाहि त्यस्तो समस्या हुने उनले बताए । ‘राजधानीमा जस्तो सुविधा र आधुनिकता मोफसलमा छैन’ : उनी भन्छन : ‘त्यसैले सिमित साधन र स्रोतका बीच काम गर्न निकै गाह्रो छ’ ।तर उनी मोफसलबाटै निर्देशनमा जम्न चाहन्छन । उनी भन्छन : ‘मोफसलमै रहेर फिल्म तथा भिडियो निर्माण निर्देशनमा केहि गर्छु’ । यसबाट विभिन्न कारणले राजधानी जान नसकेका स्रष्टाहरुलाई पनि सहज हुने उनको तर्क छ । मोफसलमा
उनले अहिलेसम्म आधा दर्जनभन्दा बढि गीतको म्युजिक भिडियो निर्माण निर्देशन गरिसकेका छन । उनको आफ्नै प्रोडक्सन हाउस पिके फिल्मस् प्रोडक्सनबाट ती म्युजिक भिडियोहरु तयार भएका हुन । प्रशान्त मानन्धरको ‘लाग्छ सुन्दर’, आशिक प्रजापतिको ‘यो पागल मन’ उनले निर्माण निर्देशन गरेका र दर्शकले रुचाएका भिडियोहरु हुन । त्यस्तै दिपेन्द्र लामाको मुटु छिया र धिरज भट्टराईको नया गीतको काम हाल भइरहेको उनले बताए ।
उनले केहि सर्ट फिल्महरु समेत निर्माण गरिसकेका छन । सर्ट फिल्मसम्बन्धी राष्ट्रिय प्रतिस्पर्धामा समेत उनी उत्कृष्टमा परेका थिए । त्यस्तै उनी ठुलो पर्दामा फिल्म ‘स्टुडेन्ट’ निर्माण निर्देशनको तयारीमा समेत छन । बिद्यार्थीको जीवनशैली र लागुऔषधको असर पर्दामा उतार्ने तयारीमा उनी छन ।
